#سرديات_حارة_النمر 

#سرد_عامي

#عاشور

في نص الليل الصويت كان جايب سوق سيدي عمر . 

في إيه ! ..

فزيت من النوم مفزوع وطلعت أجري مع زحمة البيت المكركب والكل قايم معمص وستي في المندرة اللي فوق بسطة السلم نزلت تتعكز  .. 

فيه إيه ياولاد .. ياساتر يارب .. دة في بيت مين .. 

دة جنبينا ... ياساتر استر يارب .. 

دة صويت أم عاشور 

لما خرجنا كلنا حافيين من غير شباشب 

قعدنا ننط فوق الطين والروبة اللي مالية حارتنا السد 

صوت أم عاشور كان جايب آخر الدنيا 

ياحبيبي يابني  .. ليه يابني .. ليه ياعاشور 

ونسوان الحارة المتجمعين بفساتينهم الكستور المشجرة 

بدأوا يفهموا وبدأت كل واحدة تصوت علي المنظر اللي يقطع القلب 

عاشور كان مرمي زي الهدمة المتكومة 

وركبه متنية ناحية بطنه 

ونص وشه لازق في شوية طين علي الأرض قصاد باب بيتهم

ومابين الصويت والزعيق طلعوا يجروا بيه علي الأستباليه الميري اللي علي الشارع برة 

وكنت بأجري حافي وراهم وفهمت من الكلام المنطور 

أن عاشور شرب توكسافين عشان يموت نفسه 

كنت زعلان ومصدوم 

لأني كنت بحب عاشور زي مايكون أخويا الكبير 

كان دايما يصلح العجلة التمانية وعشرين بتاعته علي شوال الخيش ويزيتها .. وهو اللي علمني ركوب العجل وكان بيسيبيني ساعات أخد لفة جوة الحارة بيها 

ليه ياعاشور عملت كدة .. 

دة إحنا من كام يوم كنا كلنا متجمعين علي السطوح اللي مفتوحة بينا .. والعيلتين كانوا متجمعين والست أنيسة  الخياطة اللي ساكنة عند أم عاشور كانت كمان موجودة هي وبنت أختها تركيه .. 

هما سموها تركيه عشان كانت شقرا 

وبيضا خالص وعينيها خضرا 

وعملنا غديوه معتبرة اللي جايب جبنة قديمة واللي جاب طعمية سخنة واللي جاب سريس وجلاوين وسلطة بدنجان واللي جاب لنا العيش 

والست أنيسة كانت جايبة حلة سوبيا نحلي بيها 

الدنيا كانت شمس وكلنا بنضحك خصوصا عاشور 

كان مبسوط علي الآخر لما شاف تركيه 

وكان بياخد ركن عشان يتودود معاها 

كلنا عارفين أنهم كانوا بيحبوا بعض 

وكنا ساعات نغيظ عاشور ونغني ...

وعاشور بيحب تركيه .. وتركيه بتحب عاشور ..

فيضحك ويجري ورانا وكأنه هيضربنا  .. 

بس يارذل منك له ..

بعد مادخلوا عاشور جوة الإسعاف وقالوا لنا أطلعوا برة

قعدت مستني علي السور اللي كان عليه اعلام كتيرة .. 

كانت أعلام بنجمتين خضر في النص ..

قلت لنفسي أرجع البيت البس حاجة في رجلي 

لأني كنت حافي. خدتها جري رايح 

وحطيت الشبشب الخدوجة ورجعت جري برضة 

وكان الصويت لسه شغال في الشارع 

في نص الطريق وأنا راجع 

الناس كانت راجعة وبتقول ربنا يرحمه 

بتوع المستشفي مقدروش يعملوا له حاجة 

كانت الرجالة عمال تعيد وتزيد  .. 

لا حول ولا قوة إلا بالله ..

أنا لله وانا إليه راجعون  .. 

ربنا يغفر له .. 

بعد كام يوم 

عرفنا أن عاشور شرب توكسافين جابه من الجمعيه الزراعية اللي أتعين فيها من كام شهر 

شرب توكسافين عشان عرف من تركيه وهي ماشية المرة اللي فاتت أن أهلها هيجوزوها قريب لها تاجر فواكة جملة غني وعنده بيت ملك في حارة الحمايدة ورانا 

وقالت له أنها موافقة .

بعدها 

فضلت العجلة التمانية وعشرين مرمية علي السطح 

جنب أكوام القش ماحدش هوب ناحيتها لحد ماصدت 

والست انيسة عزلت من بيت أم عاشور 

وجوز تركيه فتح لها مشغل حريمي في حتة راقية

وأم عاشور فضلت تعيط علي أبنها ليل نهار

#short_story_masry